Kryetari i Kuvendit të Kosovës, Dimal Basha, ka përkujtuar dhe nderuar doktor Shpëtim Robajn, me rastin e 27-vjetorit të rënies së tij.
Basha e ka cilësuar Robajn si mjekun e plagëve të lirisë, i cili jetën ia kushtoi shërimit të të plagosurve dhe mbrojtjes së jetës së pacientëve.
“Që nga pranvera e vitit 1998, Shpëtimi ishte bërë pjesë e ekipeve mjekësore vullnetare pranë spitalit të luftës në Likoc, ku shëroi plagë të civilëve të shumtë si dhe të ushtarëve të Ushtrisë Çlirimtare të Kosovës, ndër të cilët edhe Komandantin Mujë Krasniqi. Doktor Shpëtimi kishte komunikim të ngushtë edhe me organizata ndërkombëtare si Kryqi i Kuq dhe Mjekët pa Kufij, që falë bashkëpunimit u sollën pajisje dhe mbështetje për spitalin e luftës në Likoc”, ka thënë ai.
Basha gjithashtu ka theksuar heroizmin e doktor Robajt më 30 shtator 1998, kur humbi jetën duke ndihmuar të mbijetuarit e masakrës në Abri të Epërme.
“Më 30 shtator 1998, teksa shkonte për të ndihmuar të mbijetuarit e masakrës në Abri të Epërme, ku më 26 shtator forcat serbe kishin masakruar 34 civilë shqiptarë, doktori hero ra në territor të minuar. Aty Shpëtimi edhe e humbi jetën, por e fitoi pavdekësinë dhe kujtimin e përjetshëm e nderimin e përhershëm të popullit tonë. Kontributi i mjekëve si Dr. Robaj ishte jetik për moralin dhe mbijetesën e ushtarëve e qytetarëve, sepse çdo jetë e shpëtuar nga kujdesi i mjekëve ishte fitore ndaj barbarisë së armikut pushtues. Lavdi doktorit të UÇK-së, humanistit e patriotit Shpëtim Robaj. Kujtimi dhe vepra e tij do të mbeten frymëzim i përhershëm për gjeneratat e doktorëve dhe gjithë të rinjve të shoqërisë sonë”, ka deklaruar Basha.
