FC Barcelona ka reaguar për rastin e ashtuquajtur “Negreira” dhe përfshirjen e UEFA-së e Real Madridit së fundit.
Të enjten, Konfederata evropiane e futbollit (UEFA), konfirmoi se ka pranuar dokumente nga Real Madridi që lidhen me rastin Negreira.
UEFA ka theksuar se ato dokumente do t’i shqyrtojë si pjesë e hetimeve që janë duke vazhduar.
Rasti Negreira ka hyrë në një tjetër fazë të hetimeve dhe UEFA ka theksuar se ka pranuar shumë dokumente të dërguara nga Real Madridi.
Ato janë të lidhura për hetimet ndaj Barcelonës dhe Jose Maria Enriquez Negreira, ish-zëvendëspresidentit të Komitetit Teknik të Gjyqtarëve të Federatës së Futbollit të Spanjës.
Presidenti i Real Madridit, Florentino Perez, më herët ka paralajmëruar se kanë bërë gati dosje prej afro 500 faqeve.
Perezi ka qenë kritik i madh për këtë rast dhe e ka ftuar UEFA-n të reagojë. Ai e ka quajtur rastin Negreira, si “korrupsionin më të madh të historisë së futbollit”.
Rasti Negreira lidhet me pagesa të kryera për disa vjet nga Barcelona nëpërmjet kompanive që lidhen me ish-zëvendëspresidentin e Komitetit Teknik të Gjyqtarëve.
Ato pagesa e kalojnë shifrën e 7 milionë eurove, prej vitit 2001 deri në vitin 2018.
Nga Barcelona kanë thënë se nuk është një rast dhe një hetim i ri, por vetëm procedurë në vazhdim.
Por për shkak të komenteve nga Florentino Perezi, Barcelona mori veprime ligjore. Klubi nga Katalonia nisi procedurat për padi për shpifje ndaj Perezit.
Dokumentet e reja të dorëzuara nga Real Madridi tani do të përfshihen në hetimin që vazhdon të jetë i hapur dhe vazhdon të shqyrtohet nga Inspektorët e Etikës dhe Disiplinës të UEFA-s.
