Qëndron e hapur tash e 20 vite.
Por së fundmi, kjo shkollë në Lebanë të Prishtinës, rrezikon të mbyllet.
Kjo për shkak të numrit të vogël të nxënësve.
Mirëpo një gjë të tillë po e kundërshtojnë banorët e këtij fshati.
Madje për këtë, ata kanë dërguar edhe një letër Drejtorisë së Arsimit në këtë Komunë, njofton Gani Dobratiqi, kryetar I fshatit Lebanë.
“Jo me u mbyllë, por këtu duhet të ndërtohet një shkollë ose aneks t’i bashkëngjitet kësaj. Arsyeja e zvogëlimit të numrit të nxënësve është numër 1 mosinvestimi në shkollë, ka disa vite që nuk është investu në këtë shkollë as në stufa, hala nxehen me dru këtu nxënësat, janë të klasës së parë, të dytë më duket, ka edhe ndërrim të paradites dhe pasditës. Pra numër një fajtor kryesor është që nuk është bërë investimi në shkollë”, tha Dobratiqi.
E derisa kërkesa t’u realizohet, Dobratiqi thotë se nuk do të ndalen.
“Vend kemi, nëse ndërtohet shkolla atëherë gjallërohet ky vend edhe nxënësat pse me u maltretu me ardhë kombi prej fshatit Trudë vjen i merr disa në Lebanë pastaj i dërgon në Besi, pastaj prej Besie i dërgon në Bardhosh dhe ai komb fatkeqësisht privat e paguajnë prindërit, sepse nuk kemi qarkullim nuk ka pagesë prej Komune”, theksoi ai.
Në anën tjetër, Xhevrije Osmani, drejtoreshë e kësaj shkolle fillore “Nexhmi Mustafa”, thotë se nuk ka veprime në këtë drejtim, por që propozimi është i kahmotshëm.
“Jo jo, s’ka vendim. Si propozim është që disa vjet, jo veç një vit por vendim nuk ka dhe pa u marrë vendim nuk mundemi me thënë që po mbyllet. Aktualisht është sikur viteve tjera. Mundësia me u bë një çerdhe aty është vetëm nëse mbyllet për këta fëmijët 1 deri 5, përndryshe s’ka se s’ka hapësirë të mjaftueshme”, deklaroi Osmani.
Tëvë1 ka kërkuar një përgjigje për këtë çështje edhe nga drejtori i Arsimit në Komunën e Prishtinës, Arianit Elshani, por i njëjti nuk ka qenë i qasshëm për televizionin.
E para se të mbyllet një shkollë, sipas njohësit të arsimit, Ismet Potera, duhet bërë vlerësim i detajuar, pasi dëmet mund të jenë të mëdha.
“Nëse nuk ka asnjë zgjidhje atëherë duhet menduar paraprakisht se çfarë duhet bërë me ata nxënës, si t’iu ofrohet më së pari siguri e transportit, bartjes etj., sepse në aspektin pedagogjik të organizimit të mësimit, mësimi me 2-3 nxënës nuk është efektiv”, potencoi Potera.
Kjo dukuri e rënies së numrit të nxënësve tashmë është evidente në shumë fshatra të vendit, ku si rrjedhojë ka pasur mbyllje të atyre shkollave.
