FC Ballkani është përshëndetur me trajnerin Ilir Daja, i cili dje u largua përfundimisht nga kampioni aktual i Kosovës.
Klubi nga Suhareka e falënderoi trajnerin shqiptar për kontributin e dhënë dhe për punën e bërë përmes një postimi në rrjetet sociale
“Për mbi dy vjet e gjysëm kemi rrugëtuar bashkë, me shumë punë, suksese, shumë trofe e përjetime të mëdha.
Tifozë të dashur, pavarësisht se në vazhdimësi kemi qenë të dakorduar për të vazhduar edhe më tej bashkë, tashmë ish-timonjeri ynë ka konsideruar se nuk ka më shumë çfarë të jap për klubin tonë.
FC Ballkani është klub i madh dhe duke qenë i tillë, do ta bëj zgjidhjen e duhur edhe në krye të shtabit teknik, gjithmonë me të njejtat ambicie e objektiva, në ndjekje të çdo trofeu.
Kurse ecuria e Ballkanit me trajnerin Daja në krye të skuadrës, do të mbetet etapë shumë e rëndësishme e historisë tonë.
Faleminderit kampion!“ shkroi klubi Portokall e zi
Tiranasi Daja ka shkruar histori në futbollin kosovar ku gjatë kësaj kohe,Daja fitoi tre tituj kampioni, një Kupë të Kosovës dhe një Superkupë të Kosovës, ndërsa e udhëhoqi Ballkanin dy herë radhazi në grupet e Ligës së Konferencës.
