Ekipi me i suksesshëm i Republikës së Irlandës, Shamrock Rovers do të jetë kundërshari i radhës për Ballkanin në kualifikimet e Ligës së Konferencës.
Këto dy skuadra do të përballen në raundin e tretë kualifikues të kësaj gare, pasi me sukses e kaluan raundin e dytë.
Ballkani e eliminoi FC Floriana të Maltës me rezultatin e përgjithshëm 5:3 derisa Shamrocku ishte më i mirë se St. Joseph’s i Gjibraltarit me shifrat 4:0.
Ndeshjen e parë, Ballkani e luan më 7 gusht në stadiumin “Fadil Vokrri” në Prishtinë kurse e kthimit do të luhet një javë më vonë në Irlandë.
Nëse Ballkani e kalon edhe këtë pengesë, atëherë do të kualifikohet në “play-off” të Ligës së Konferencës, në tentim për të siguruar fazën e grupeve të kësaj gare për herë të tretë në histori të klubit.
Megjithatë, Shamrocku nuk do të jetë kundërshtar i lehtë për Ballkanin duke pasur parasysh se është ekipi më i suksesshëm në Republikën e Irlandës.
Në raundin e tretë kualifikues të Ligës së Konferencës, do të paraqiten edhe Egnatia e Dinamo City, skuadra që do të përballen me Olimpijën e Sllovenisë, përkatësisht Hajdukun e Splitit.
