Ballkani i Suharekës dhe zyrtarët e tij kanë marrë gjoba të majme nga Komisioni Disiplinor i Federatës së Futbollit të Kosovës për incidentin në ndeshjen ndaj Dukagjinit.
Të premten Komisioni Disiplinor ka gjobitur Ballkanin me 1.500 euro për lëshim në organizimin e ndeshjes, e cila u luajt në Suharekë të dielën e shkuar dhe përfundoi 1:1. Në vendimin e Komisionit thuhet se pasi futbollistët e të dyja skuadrave kishin hyrë në zhveshtore “në tunelin e stadiumit ishin grumbulluar 15-20 persona të paautorizuar, të cilët kanë ofenduar FFK-në dhe tentuan t’i sulmonin referët, por falë ndërhyrjes së policisë u evitua incidenti”.
Po ashtu raportohet se pas përfundimit të ndeshjes persona të paautorizuar kanë sulmuar lojtarët e Dukagjinit, por intervenimi i policisë ka evituar pasojat nga ky sulm.
Trajneri i Ballkanit, Ilir Daja, për shkak të akuzave se ekipi i tij me qëllim është dëmtuar nga gjyqtarët e ndeshjes, është gjobitur me 1.000 euro. Gjobë prej 1000 eurosh ka marrë edhe kryetari i Ballkanit, Arsim Kabashi, i cili, sipas komisionit, ka hyrë në zhveshtore të gjyqtarëve duke i kërcënuar e fyer edhe në baza familjare. Ndihmësmenaxheri i Ballkanit, Idriz Hajrizi, është gjobitur me 400 euro, si dhe suspendim për tri ndeshje, pasi jo vetëm që ka fyer gjyqtarët, por ka tentuar ta godiste referin e VAR-it, Mervan Bejtullahu. Ndërkohë, drejtori sportiv i Ballkanit, Nderim Nexhipi, për fyerje ndaj gjyqtarit Bejtullahu ka marrë gjobë në vlerë prej 300 eurosh.
