Pas fitores javën e shkuar në Prishtinë, skuadra e Ballkanit kërkon që me fitore edhe në Maltë ta konfirmojë avancimin në raundin e tretë kualifikues të Ligës së Konferencës.
Ballkani triumfoi 4:2 ndaj FC Floriana në stadiumin “Fadil Vokrri”, ndërsa sot prej orës 19:30 luan ndeshjen e kthimit në Paola të Maltës.
Skuadra nga Suhareka edhe nëse nuk fiton në Maltë, mund të avancojë në raundin tjetër kualifikues edhe me barazim dhe humbje me një gol dallim, por te Ballkani duan fitore edhe në duelin e kthimit.
Ballkani garimin evropian e ka nisur prej raundit të dytë kualifikues, ndërsa FC Floriana prej raundit të parë, të cilin e ka kaluar me sukses.
Nënkampioni i Kosovës në garat evropiane ka debutuar në sezonin 2022/23, në të cilin edhe e ka shkruar historinë duke u kualifikuar në fazën e grupeve të Ligës së Konferencës.
Këtë sukses historik, Ballkani e përsëriti edhe në sezonin 2023/24, përpara se sezonin e shkuar të ndalet në raundin e tretë kualifikues të Ligës së Konferencës.
Ballkani këtë sezon synon fazën grupore dhe për ta bërë një gjë të tillë, duhet ti eliminojë edhe dy kundërshtarë të tjerë nëse e kalon FC Floriana.
Në rast të avancimit në raundin e tretë kualifikues të Ligës së Konferencës, Ballkani përballë pritet ta ketë Shamrockun e Irlandës, i cili në ndeshjen e parë ndaj St. Joseph’s triumfoi me shifrat 4:0.
