Kandidati për deputet nga Lëvizja Vetëvendosje, Alban Bajrami, ka deklaruar se prioriteti i subjektit të tij politik në zgjedhjet e 28 dhjetorit është formimi i një qeverie që nuk mund të vihet nën presion nga deputetë individualë.
Në emisionin “Info Nata” në Tëvë1, Bajrami është shprehur i bindur se Vetëvendosje do të dalë bindshëm forca e parë politike në zgjedhjet e ardhshme.
“Synimi ynë është që të kemi një qeveri e cila nuk është e shantazhueshme nga dy-tri deputetë që pretendojnë se mund ta shantazhojnë Republikën vetëm me dy ose tri vota.Vetëvendosje subjekti i parë, pa diskutim larg ose dy subjektet i dyti dhe i treti do të jenë më pak se i pari”, ka thënë ai.
Bajrami ka theksuar se kritikat e tij për deputetët shantazhues nuk lidhen me Nismën Socialdemokrate, duke shtuar se ky subjekt “e ka marrë vendimin e vet për të cilin do ta paguajë” në zgjedhje.
Sipas tij, Nisma ka rënë në “grackën” e partive opozitare, të cilat sipas Bajramit i kanë premtuar përfshirje në listat e tyre, por në fund e kanë lënë jashtë.
“Kjo ka qenë gracka që ua kanë bërë LDK dhe PDK, se iu kanë thënë të mos shkojnë me Vetëvendosjen, e më pas kur ka kaluar afati u është thënë se nuk ka mundësi për t’i marrë”, ka deklaruar Bajrami, duke shtuar se për këtë arsye Nisma ka mbetur jashtë skenës parlamentare.
Sa i përket pretendimeve të kryetarit të Nismës, Fatmir Limaj, se subjekti i tij do ta kalojë pragun, Bajrami është shprehur ironikisht:
“Për besë, mua më pëlqen vetëbesimi i tij. Vetëm disa aktorë të skenave të mëdha botërore të teatrit e kanë vetëbesimin më të madh se Fatmir Limaj. Kur del ai të flasë, të duket sikur është kryetar i New Yorkut dhe i ka 12 milionë banorë pas vetes, ndërsa ai nuk i ka as 12 mijë vota. Ai flet për punë të mëdha, por në fund historikisht e ka problem kalimin e pragut. E kritikon Vetëvendosjen, pastaj shkon e bëhet me LDK-në dhe e quan burrë të madh Lumirin, e ai pastaj e lë në rrugë.Kërkesa jonë nuk ka qenë që ai të vijë me ne, por t’i jepnim vendit një zgjidhje të përkohshme deri në përfundimin e mandatit të presidentes. Por me mospranimin e kësaj, ata e kanë dëmtuar Kosovën, por më shumë vetveten,” ka përfunduar ai./teve1.info/
