Kryenegociatori i Kosovës në dialogun teknik me Serbinë, Agron Bajrami, ka bërë të ditur se e ka ngritur edhe në Bruksel zyrtarisht çështjen e deklaratave fashiste të ministres serbe, Snezhana Paunoviq, duke i dërguar letër ndërmjetësuesit të BE-së për dialogun Peter Sorensen.
Ai ka thënë se deklarata e ministres serbe, por edhe sjelljet e zyrtarëve serbë, janë shkelje e Marrëveshjes së Brukselit.
Bajrami ka thënë se retorika e Serbisë minon dialogun e ndërmjetësuar nga Bashkimi Evropian, duke shtuar pyetje se nëse ka kuptim të flitet për zbatim të marrëveshjes pas këtyre sjellje të Serbisë.
“Deklarata dhe sjellje të tilla nga zyrtarët serbë përbëjnë një shkelje të qartë të Marrëveshjes së Brukselit të vitit 2023, preambula e së cilës angazhon palët të “kapërcejnë trashëgiminë e së kaluarës” dhe pranon se “paprekshmëria e kufijve dhe respektimi i integritetit territorial dhe sovranitetit… janë kusht themelor për paqen”.Kjo retorikë minon seriozisht Dialogun e ndërmjetësuar nga BE-ja, besimin dhe procesin e normalizimit të bazuar në njohje dhe respekt të ndërsjellë. Distancimi i Serbisë nga kjo deklaratë është vetëm formalitet – jo pendesë e sinqertë apo refuzim i krimeve të epokës së Millosheviqit. Çfarë kuptimi ka të flitet për zbatimin e marrëveshjeve, kur Serbia vazhdon t’i shkelë ato me fjalë dhe me vepra?”,ka shkruar Bajrami.
Ai ka thënë se Kosova mbetet e përkushtuar në procesin e dialogut, por vetëm nëse parimet themelore të tij respektohen në mënyrë të vazhdueshme.
Kosova ka shpallur “nongrata” ministren serbe pas deklaratës së saj për spastrim etnik në Kosovë, duke ngritur poashtu edhe kallëzim penal.
Deklarata e saj është dënuar edhe nga Bashkimi Evropian.
Ndërsa, në Serbi opozita është dërguar kërkesë për shkarkimin e saj.
Gërvalla me kallëzim penal ndaj Paunoviqit: Nuk do të tolerohet gjuha e urrejtjes
