Bajqinovci njoftoi se tanimë është vetëm çështje ligjore zëvendësimi i tyre nga KQZ-ja.
“Çështja ligjore është që kryetari i Kuvendit, Glauk Konjufca, ka kërkuar nga KQZ-ja që të zëvendësohen përfaqësimi i serbëve në Kuvendin e Kosovës. Ata tani e kanë një afat që duhet të lajmërohen në tri seancat e fundit në momentin kur u vie emri në Kuvend, në rast se nuk lajmërohen ata do të largohen dhe zëvendësohen me të tjerë nga parti tjera”, tha ai në emisionin “Këndi i Debatit” në Tëvë1.
Se a ka kushte të sigurisë për të mbajtur zgjedhje në komunat veriore, Bajqinovci u shpreh optimist, mirëpo sipas tij, përsëri duhet të presin për të parë se si do rrjedhë situata.
“Unë besoj që kushtet bëhen, sepse edhe institucionet e sigurisë mund të garantojnë procesin. Zgjedhjet duhet të mbahen sepse kjo është një obligim kushtetues, por si shkon situata duhet të presim”, shtoi ai.
Mirëpo, Bajqinovci tha se dilemë tjetër është edhe nëse do votojnë qytetarët atje.
Kujtojmë se deputetët e Listës Serbe zyrtarisht kanë dorëzuar dorëheqjet e tyre në Kuvendin e Kosovës.
Në një mbledhje në Mitrovicë të Veriut, më 5 nëntor 2022, të ftuar nga Lista Serbe, në cilën morën pjesë zyrtarë të lartë shtetëror nga komuniteti serb, u njoftua largimi i tyre nga institucionet, përfshi niveli qendror ekzekutiv, lokal e nga gjyqësori./Teve1.info/.
