Avokati i popullit, Naim Qelaj, gjatë së enjtes ka qëndruar për vizitë në Komunën e Leposaviqit.
Ai fillimisht vizitoi fshatin Leshak, ku u takua më banorët lokalë dhe i dëgjoi nga afër shqetësimet e tyre.
Një pjesë e banorëve të komunitetit serb janë ankuar lidhur me vendimin për rrënimin e 12 shtëpive pas vendimit të Ministrisë së Punëve të Brendshme, për shkak se sipas tyre ato kanë qene pa leje.
Por, Qelaj u shpreh optimist se kjo çështje si dhe probleme të tjera mund të zgjidhen vetëm përmes dialogu të sinqertë.
Këto shqetësime të banorëve ai ia paraqiti në takim edhe kryetarit të Leposaviqit, Lulzim Hetemit.
“Shqetësimi i parë që u ngrit në takimet që unë pata me qytetarët në Leshak ishte për mungesën e informimit dhe mungesën e transparencës së komunës në vendimmarrje për rrënimin e objekteve të ndërtuara pa leje në hapësirat publike”, tha Qelaj.
Në anën tjetër, pari i Leposaviqit, Hetemi tha se dera e komunës ka qenë e hapur gjithmonë për banorët serbë por që sipas tij, një pjesë e tyre kanë refuzuar ta takojnë dhe të diskutojnë për çështjen e 12 shtëpive.
“Sa i përket shqetësimeve për qytetarët e qytezës në Leshak ata në një mënyrë nuk kanë ardhur kurrë me më taku dhe meqenëse i kam thënë Marinës thirri ndonjëherë në takim, njëherë ose dy por nuk na u kanë përgjigjur. Kur është në pyetje komuna – kryetari Hetemi, na jemi si struktura paralele për ta. Ne nuk e kemi marrë vendimin në krye në veti si Komunë. Ne kemi ndërhyrë për shkak se janë qytetarë të Kosovës dhe janë qytetarë të Komunës së Leposaviqit. Për 12 familje jemi dalë në terren – filani është biznesmen, ka biznes në Leshak tjetër kund, ka shtëpi në Leshak e ka uzurpua aty”, tha Hetemi.
Megjithatë, 12 shtëpitë në fshatin Leshak të Komunës së Leposaviqit nuk do të rrënohen, të paktën jo deri sa të vendoset një zgjidhje për familjet që jetojnë aty.
Në zonën e Leshakut shtëpitë janë ndërtuar në mes viteve 2013 dhe 2015 ndërsa afër tyre së fundmi MPB ndërtoi një stacion policor.
