Mesfushori i Kombëtares së Shqipërisë, Kristjan Asllani pritet të kthehet te skuadra e Interit me të përfunduar sezoni aktual.
Asllani është i huazuar te Beshiktashi, ekip që ka opsionin e tij të blerjes por që i ka ofruar Interit më pak për transferimin e përhershëm të mesfushorit.
Interi po kërkon të paktën 10 milionë euro për Asllanin, i cili nuk ka bindur siç pritej te Beshiktashi, ekip që nuk e ka ndërmend të paguajë më shumë se 6 milionë euro për kartonin e tij.
Në rast se klubet nuk arrijnë marrëveshjen, atëherë Asllani në verë do të kthehet te Interi, me ekipin italian që menjëherë do ta nxjerrë në shitje pasi nuk llogarit në shërbimet e tij.
Asllani në janar u huazua te Beshiktashi pas muajve që i kaloi te Torino, po ashtu në huazim por që ekipi nga Serie A preferoi ta shkëputë marrëveshjen me Interin për 24-vjeçarin, duke e kthyer para kohe.
Mesfushori shqiptar ka kontratë me Interin deri në vitin 2028 dhe te Beshiktashi ka vetëm 10 paraqitje deri më tani, ku ka bërë edhe 1 asistim.
