Dikur shërbente për peshkim e notim.
Por gjendja në të cilën është tani liqeni akumulues në Mitrovicë, nuk lë hapësirë për ndonjë aktivitet.
Të shqetësuar me gjendjen e krijuar këtu, janë vetë mitrovicasit.
“Unë jam edhe peshkatar, kjo ka mbet tash as për peshkim as për me u la. Vjet për vjet kjo nuk po pastrohet, që dy tri vite po mundohen me pastru, por nuk po bëhet se prapë po del bari”, u shpreh Nijazi Behrami-qytetar.
Për situatën e krijuar, kanë reaguar edhe opozita në këtë komunë.
“Kontrata është aktive dhe është nënshkruar në fund të 2025, pajisja është funksionale dhe është aktive. Ne kemi kërkuar që drejtoria përkatëse në bazë të kontratës aktive me u kujdes e me monitoru që duhet vetëm me u zbatu kontrata, përndryshe nëse zbatohet kontrata këto barishte nuk bëhen. Është problem i kamotshëm, nuk është problem vetëm i kësaj qeverisje, është problem prej kohës kur është larguar zalli”, thotë Shkëlqim Ibrahimi – asamblist i PDK-së.
Por nga Komuna thonë se kanë ndërmarrë të gjithë veprimet e nevojshme.
“Kemi filluar me pastrimin e brishtave, fillimisht është rregulluar anija për pastrimin e ujit që ka qenë e dëmtuar në fund të mandatit të qeverisjes paraprake. Ne e kemi sanu, e kemi rregullu, e kemi bë gjithë mirëmbajtjen e nevojshme edhe me një anije tjetër që ka qenë e blerë më herët prej Komunës së Mitrovicës. Këto janë mjetet të cilat i kemi në dispozicion për shkak që hapësira për pastrimin e liqenit është pak e ndjeshme dhe nuk mundemi me hy e me i largu barishtet në formë tjetër”, shprehet Shkelzën Halimi, zëdhënës për informim në Komunën e Mitrovicës.
Nga Komuna e Mitrovicës treguan se janë duke punuar në krijimin e një taskforce e cila do të merret vetëm me çështjen e liqenit.
