Skuadra e Arsenalit po kalon formë të lartë në Premier Ligë duke u renditur në vend të parë pas 20 javëve.
Sigurisht, kjo ecuri e mirë e ekipit ka ardhur si rezultat i individëve të jashtëzkonshëm në brenda formacionit. Një prej tyre është edhe Gabriel Martinelli, me brazilianin që ka shënuar 7 gola dhe ka dhënë dy asistime për shokët e tij në 19 paraqitje në Premier Ligë këtë edicion.
Kjo i është shpërblyer sulmuesit, pasi klubi i ka ofruar kontratë të re afatgjate dhe me rritje page. Gabi deri më tani përfitonte rreth 70 mijë funta në javë dhe kontrata e tij ishte valide deri në verën e vitit 2024, ndërsa me marrëveshjen e re ai do të përfitojë 180 mijë funta në javë, ndërsa kjo e mbanë atë në Emirates deri në vitin 2027, me mundësi vazhdimi për një vit.
Përfaqësuesi i Brazilit u shpreh mjaft i lumtur me vazhdimin e kontratës së tij me ‘Gunners’
“Rrugëtimi vazhdon. Jam shumë krenar që kam nënshkruar një kontratë të re me familjen e Arsenalit. Që nga momenti që i jam bashkuar stafit, bashkëlojtarët e mi dhe tifozët më kanë bërë të ndihem si në shtëpi. Jam i emocionuar për të ardhmen dhe se çfarë do të na sjell ajo”, ka shkruar Martinelli.
Arsenali e kishte transferuar 21 vjeçarin në vitin 2019, nga skuadra e ligës së katërt të brazilit, Ituano, për vetëm 6 milionë euro. Pas nënshkrimit me të, drejtori Edu po punon për të vazhduar kontratat edhe me William Saliba dhe Bukayo Saka.
