Policia e Kosovës ka arrestuar një 36 vjeçar të kërkuar për veprat penale “Vrasje në tentativë” dhe “Mbajtje në pronësi, kontroll ose posedim i paautorizuar të armëve”, në Ferizaj.
Sipas njoftimit zyrtar, arrestimi u realizua nga tri ekipe të NJRSH-së, pas një informacioni të marrë rreth orës 18:00, që tregonte se i kërkuari ndodhej në një klub fitnesi në qytet.
Pas përfundimit të procedurave të nevojshme ligjore, F.M. u dërgua për vuajtje të dënimit prej 2 vjet e 6 muaj.
“Më datën 09.12.2025, rreth orës 18:00, Njësia e Reagimit të Shpejtë (NJRSH) – Ferizaj ka pranuar një informatë se personi i kërkuar F.M. (36 vjeç) ndodhej në një klub fitnesi në Ferizaj. Ai ishte në kërkim me urdhëresë aktive të lëshuar nga Gjykata Themelore në Ferizaj për veprat penale “Vrasje në tentativë” dhe “Mbajtje në pronësi, kontroll ose posedim i paautorizuar të armëve”. Pas pranimit të informacionit, tri ekipe të NJRSH-së kanë dalë menjëherë në vendin e ngjarjes dhe kanë realizuar arrestimin e tij. Pas kompletimit të dokumentacionit të nevojshëm, është dërguar në vuajtje të dënimit në kohëzgjatje prej 2 vjet e 6 muaj. Policia Rajonale e Ferizajt mbetet e përkushtuar në zbatimin e urdhëresave të gjykatës dhe në arrestimin e personave në kërkim”, thuhet në njoftim.
