Një person nga Peja është arrestuar të mërkurën në Vlorë, pasi ishte kapur në flagrancë teksa tentonte të vidhte një veturë.
Siç ka njoftuar Policia e Shqipërisë, 23-vjeçarit me inicialet G.P. i është gjetur edhe një thikë, që është sekuestruar.
Sipas njoftimit, pos kapjes në flagrancë gjatë tentimit të vjedhjes së një veture, 23-vjeçari dyshohet për edhe një vjedhje tjetër para pak ditësh në një lokal në Vlorë.
“Si rezultat i reagimit të shpejtë dhe punës së pandërprerë për parandalimin dhe zbardhjen e rasteve të vjedhjes, si dhe për kapjen e autorëve të tyre, specialistët e Seksionit për Hetimin e Krimeve në Komisariatin e Policisë Vlorë bënë të mundur arrestimin në flagrancë të shtetasit G. P., 23 vjeç, banues në Pejë, Kosovë. Ky shtetas u kap më datë 10.03.2026 , rreth orëve të para të mengjesit, në lagjen “24 Maji”, në momentin që po tentonte të vidhte një automjet tip furgon. Ndërhyrja e menjëhershme e shërbimeve të Policisë bëri të mundur kapjen e tij në flagrancë dhe parandalimin e vjedhjes. Gjatë kontrollit personal, shërbimet e Policisë i gjetën dhe sekuestruan në cilësinë e provës materiale një mjet prerës (thikë). Nga veprimet hetimore të kryera rezulton se i njëjti shtetas dyshohet të jetë autor edhe i një vjedhjeje tjetër, të ndodhur më datë 06.03.2026, ku është marrë një shumë parash në një lokal në lagjen “10 Korriku”, në qytetin e Vlorës”, thuhet në njoftim.
Ai dyshohet tani për veprat penale të vjedhjes dhe mbajtje pa leje të armëve të ftohta.
