Policia e Kosovës ka arrestuar një person të shpallur në kërkim, i dyshuar për përfshirje në një incident që rrezikoi sigurinë publike në Mitrovicën e Jugut.
Sipas njoftimit zyrtar të Policisë së Kosovës, i publikuar në rrjetin social Facebook, i dyshuari Ç. B., 26-vjeçar, shtetas i Republikës së Kosovës, është arrestuar në Aeroportin Ndërkombëtar të Prishtinës pas një periudhe hetimesh intensive nga hetuesit e Sektorit Rajonal të Hetimeve në Mitrovicë.
“Personi i arrestuar ishte shpallur në kërkim për veprën penale ‘Shkaktim i rrezikut të përgjithshëm’, pasi dyshohet se më 18 gusht 2025, ka hedhur një shishe me lëndë ndezëse në një market në rrugën ‘Mbretëresha Teutë’ në Mitrovicën e Jugut,” thuhet në njoftim.
Pas arrestimit dhe intervistimit nga organet kompetente, me vendim të prokurorit i dyshuari është dërguar në ndalim policor.
Hetimet në lidhje me rastin janë në vazhdim.
