Policia e Kosovës ka arrestuar dy persona, njëri nën dyshimin se ka kryer veprën penale ‘’keqpërdorim i pozitës apo autoritetit zyrtar” dhe tjetri për ‘’falsifikim të parasë”.
Ata dyshohet se kanë futur 7 mijë euro të falsifikuara në shërbim në postën e Rahovecit.
Njëri prej të arrestuarve është menaxher në këtë postë.
“Policia ka arrestuar dy të dyshuar, B.D., (viti i lindjes 1983, mashkull kosovar, menaxher në postën në Rahovec) dhe H.D., (viti i lindjes 1989, mashkull kosovar). Në postë janë gjetur dhe konfiskuar, nën dyshimin se janë të falsifikuara, shuma e monedhave prej: 1362 X 2 =2 724 €, 970 X 1= 970 €, 1480 X 0.50=740€, gjithsej 4434 €. Po ashtu, dyshohet se 2566 € janë shpërndarë tek qytetarë që kanë kryer shërbime në këtë postë e të cilët janë mashtruar me këto veprime të të dyshuarve”, thuhet në njoftimin e policisë.
Policia po ashtu ka bërë të ditur se janë kontrolluar edhe dy lokacione, shtëpia e banimit e personave të dyshuar dhe një lokal biznesi (dyqan).
Të dy të dyshuarit janë ndaluar për 48 orë.
