Kapiteni i skuadrës së Gjilanit, Armend Thaqi e ka fituar epitetin e futbollistit më të mirë për xhiron e 17-të në Superligën e Kosovës.
FFK-ja, të martën ka bërë të ditur se Thaqi e ka fituar çmimin “Ylli i Javës”, i cili ndahet për lojtarin me paraqitjen më të mirë në secilën xhiro.
Komisioni i veteranëve të futbollit, ka konstatuar se Thaqi ishte më i mirë në xhiron e shkuar pasi ishte më i merituari për fitoren e Gjilanit në derbin kundër Dritës me rezultatin 1:0.
Thaqi, jo vetëm që pati paraqitje të mirë, por edhe shënoi golin e vetëm të këtij takimi për ta kthyer Gjilanin tek fitorja.
Pasi ka pranuar çmimin “Ylli i Javës”, Thaqi ka thënë se fitorja ndaj Dritës i jep besim të madh ekipit të Gjilanit për ndeshjet e stinorit pranveror.
Gjithashtu, Thaqi e ka vlerësuar këtë çmim si tejet të rëndësishëm, por ka thënë se për këtë kanë merita të mëdha trajneri Ardian Nuhiu dhe bashkëlojtarët e tij.
“Ky është një çmim që ia dedikoj trajnerit Ardian Nuhiu dhe të gjithë futbollistëve, pasi ky sukses është rezultat i angazhimit të gjithsecilit”, ka thënë Thaqi.
