Gjykata Speciale në Hagë pritet që nesër, në orën 10:00, të shpallë aktgjykimin në rastin e dytë ndaj ish-presidentit të Kosovës, Hashim Thaçi, dhe katër të akuzuarve të tjerë, lidhur me pretendimet për pengim të drejtësisë.
Përveç Thaçit, në këtë proces gjyqësor janë të përfshirë edhe ish-drejtori i AKI-së, Bashkim Smakaj, ish-kryetari i Malishevës, Isni Kilaj, veterani i UÇK-së, Fadil Fazliu, si dhe ish-ministri i Drejtësisë, Hajredin Kuçi.
Në këtë rast, Zyra e Prokurorit të Specializuar ka kërkuar dënime me burgim për të akuzuarit. Për Thaçin është kërkuar gjashtë vjet burgim, ndërsa për Bashkim Smakajn, Isni Kilajn dhe Fadil Fazliun nga tri vjet burgim. Për Hajredin Kuçin, prokuroria ka kërkuar nëntë muaj burgim.
Në rast se Thaçi shpallet fajtor, dënimi eventual do të ishte i dyti për të, pas atij të shqiptuar në procesin tjetër gjyqësor.
Aktakuza në këtë çështje ishte dorëzuar më 5 dhjetor 2024, ndërsa gjykimi është zhvilluar para gjykatësit të vetëm, Christopher Gosnell.
Procesi gjyqësor ka përfshirë gjithsej 11 ditë seanca në sallën e gjyqit, gjatë të cilave janë dëgjuar katër dëshmitarë, si dhe janë administruar pesë dëshmi me shkrim.
Në seancën e fjalëve përfundimtare, të mbajtur në shtator, mbrojtja e Thaçit kishte kërkuar që vendimi të mbështetej vetëm në prova dhe jo në spekulime, duke insistuar në lirimin e tij nga të gjitha akuzat.
“Ne kërkojmë që vendimi juaj të bazohet në prova dhe jo spekulime, dhe të jetë lirim nga të gjitha akuzat”, kishte deklaruar avokatja Sophie Menegon.
Vendimi i nesërm pritet të përcaktojë epilogun e këtij procesi gjyqësor ndaj pesë të akuzuarve.









