Të shtunën, gjashtë aeroplanë kinezë ateruan fshehurazi në aeroportin e Beogradit.
Por, këta aeroplanë ushtarakë brenda tyre nuk po mbanin udhëtarë.
Nga aty, përmes një operacioni sekret, u nxorën raketa anti-ajrore.
E kur gjithçka doli në publik, këtë e konfirmoi edhe ministria e jashtme e Kinës.
“Për ta zbatuar planin bilateral të bashkëpunimit në mes të Kinës dhe Serbisë, Kina së fundi dërgoi avionë transporti të forcave ajrore për të ofruar furnizime të rregullta ushtarake për Serbinë”, ka thënë Zhao Lijian, zëdhënës në Ministrinë e Jashtme të Kinës.
E kjo gjë, e ka shqetësuar edhe ministrin e Mbrojtjes në Kosovë, Armend Mehajn.
Ky i ka quajtur të neveritshme veprimet e shtetit serb, ne kohën kur bota po përballet me agresionin rus.
“Prandaj, kërkojmë nga autoritetet e vendimmarrjes së NATO-s, BE-së dhe OKB-së, si dhe të gjitha instancat tjera të politikëbërjes pro-vlerave të paqes, lirisë dhe demokracisë të shqyrtojnë me seriozitetin maksimal këtë qasje destruktive dhe të rrezikshme të Serbisë që ndikon seriozisht në minimin e paqes, sigurisë dhe stabilitetit në rajonin e Ballkanit Perëndimor dhe më gjerë”, ka thënë Mehaj.
E ish-komandanti i FSK-së, gjeneral Kadri Kastrati, thotë se shteti serb po punon për destabilizimin e rajonit.
Por sipas tij, ky është edhe një mesazh për Kosovën.
“Kjo është një shqetësim shumë serioz për Republikën e Kosovës edhe një mesazh që Kosova ta qet në prioritet ushtrinë e vet, policinë dhe AKI të investojë, për të qenë të sigurt kufijtë dhe qytetarët e saj”, ka deklaruar Kastrati.
Sipas Kastratit, Qeveria e Kosovës duhet të ndaj më shumë mjete për ushtrinë në rishikimin e ardhshëm të buxhetit.
Ndërkohë, buxheti aktual për FSK-n, është 100 milionë euro.
Por, a mund të përdoret kjo shumë e gjitha për të blerë pajisje ushtarake?
Ndryshe, kjo nuk është hera e parë që shteti serb, blen armatim nga Kina.
Raporti i gazetarit Fidan Zejnullahu.