Kryetari i Bujanocit, Nagip Arifi ka thënë se me ftesë të Gjykatës për Kundërvajtje në Vranjë sot është paraqitur në zyrat e kësaj gjykate me akuzën për mosulje të flamurit shtetëror në gjysmështizë me rastin e shpalljes ditë zie të datës 27.09.2023, që ka të bëjë me rastin e Banjskës së Zveçanit.
Ai tha se sa të jetë kryetar i kësaj komunë nuk do t’i nderojë terroristët e rënë në Republikën e Kosovës dhe nuk do t’i përfill urdhrat e presidentit serb, Aleksandër Vuçiq.
“Me 27 shtator të vitit të kaluar, presidenti i Serbisë ka shpallur ditë zije në tërë territorin e Republikës së Serbisë dhe ka urdhëruar që flamuri i Serbisë të bëhet në gjysmë shtizë. Unë atë vendim nuk e kam respektuar dhe gjykata për kundërvajtje ka bërë kallxim penal, ku sot isha në Vranjë, ku edhe dhashë dëshminë time. Sa do të jem kryetari i Bujanocit nuk do të respektojë terroristet serbë që kanë rënë në Republikën e Kosovës”, ka thënë ai në emisionin “Ditari” në Tëvë1.
Tutje, tha se këto veprime janë bërë për të frikësuar atë dhe shqiptarët në Luginë.
“Kjo është një hakmarrje ndaj qytetarëve të Luginës së Preshevës…kryesisht ndaj meje si kryetarë… qëllimi është që unë të frikësona, por ashtu edhe qytetarët e Luginës. Unë sot para gjykatësit kamë thënë se nëse mendoni që do të frikësohem nga këto veprime të juaja, e keni gabim. Jam gati të jap llogari për punën që e bëjë dhe nuk kam frikë dhe nuk kam pasur kurrë nga organet e Serbisë”, ka thënë ai.
Kujtojmë që në fshatin Banjskë të komunës së Zveçanit, grupe të armatosura serbësh sulmuan policinë e Kosovës më 24 shtator, duke vrarë rreshterin Afrim Bunjaku.
Në shkëmbimin e zjarrit që pasoi, u vranë edhe tre sulmues.
Ndryshe, katër ditë pas ngjarjeve në Bansjkë, me 97 vota për, Kuvendi i Kosovës ka miratuar rezolutën që dënon sulmin terrorist që ndodhi në Banjskë./teve1.info
