I ftuar në emisionin “Info Nata” ai tha se dialogu ka mundur të jetë pika kryesore e këtij takimi, por që sipas tij, mund të kenë qenë edhe sulmet kibernetike që kanë ndodhur në Shqipëri dhe disa vende të rajonit gjatë këtyre ditëve.
Sipas Arifit, kryeministri Rama nuk dihet saktësisht se çka i ka kërkuar Kurtit, por siç tha ai me siguri po i kërkohet një marrëveshje gjysmake pra bashkëpunim Kosovë-Serbi por pa njohje reciproke.
“Normalisht që Serbisë nuk i duhet njohja e Kosovës por Kosovës i duhet dhe për të mundur që në njëfarë mënyre Kosova të lëvizë në drejtë integrimeve evropiane. Apo në njëfarë mënyre pranimi i disa kërkesave që mund të kenë ardhë edhe nga këshilltarët e presidentit francez dhe kancelarit gjerman. Këto ne normalisht që nuk mund ti dimë saktësisht por mund të supozojmë, por duke i njohur rrethanat në Shqipëri dhe kryeministrin Rama po besoj që janë pikat të cilat veç i kemi debatuar dhe diskutuar por nuk besoj që kryeministri i Kosovës, z. Kurti do të bëjë ndonjë avanturë sepse marrëveshjet gjysmake gjithmonë po vërehet që Ballkani Perëndimor ka prodhuar më shumë jo stabilitet sesa paqe afatgjate”, tha Arifi.
Politologu theksoi se Rama nuk mund të ndihmojë në dialog, sepse sipas tij, këtë mund ta bëjnë vetëm fuqitë e mëdha.
“Nuk besoj që mund të ndihmojë drejtpërdrejtë ndoshta tërthorazi mund ta bind Kurtin për ndonjë lëshim diku por nuk besoj që mund të ndihmojë sepse ai nuk e ka fuqinë që ti ndihmojë shqiptarëve në Luginë të Preshevës që mos të diskriminohen nga regjimi i Vuqicit e tash lëre më ti ndihmojë Kosovës në dialog me Serbinë. Nuk po e shoh këtë paralele por sidoqoftë nëse ka vullnet të mirë për ti ndihmuar normalisht që është i mirëseardhur por, duke ditur edhe fuqinë e shtetit shqiptar, pra fuqinë diplomatike politike e ushtarake nuk besoj që mund ta bëjë ndonjë kontribut të madh për ta bindur Serbinë apo Kosovën që të bëjnë ndonjë kompromis këtë mund ta bëjnë vetëm fuqitë e mëdha”, shtoi ai./teve1.info./
