Veteranët e luftës nuk e fshehin zhgënjimin që kanë me Gjykatën Speciale.
Ashtu siç edhe kishin paralajmëruar veteranët e Ushtrisë Çlirimtarë të Kosovës protestuan kundër vizitës në Kosovë të kryetares së Dhomave të Specializuara, Ekaterina Trendafilova.
Për t’ia pamundësuar konferencës Trendafilovës ata u pozicionuan para hotelit ku po qëndronte ajo, disa prej protestueseve hodhën tym të zi para objektit dhe thirrën “UÇK, UÇK”.
Ata njëzëri kërkuan që të mos mbahet konferenca për medie e thirrur nga Trendafilova.
Veterani i Ushtrisë Çlirimtare të Kosovës, Nexhat Ibishi, thotë se bashkëluftëtarët e tij po mbahen padrejtësisht në Hagë andaj edhe po proteston.
“Ish-krerët e Ushtrisë Çlirimtare të Kosovës po mbahen padrejtësisht në paraburgim që 5 vjet dhe askush nuk jep përgjegjësi për këtë situatë. Prandaj ne kemi vendosur sot që të protestojmë kundër të kryetares së Dhomave të Specializuara, Ekaterina Trendafilova”, ka thënë Nexhat Ibishi
Tutje veterani tjetër, Rashit Ymeri, konsideron se kjo Gjykatë është njëanshme.
“Sot kemi dalë me protestua kundër kësaj Gjykatë e cila është e njëanshme sepse aty po gjykohen vetëm shqiptarët. Ata që po mbahen në Hagë kanë sakrifikuar dhe kanë gjak për lirinë e vendit”, ka thënë veterani Ymeri
Mirëpo Ymeri tregoj edhe disa pakënaqësi që ka në lidhje me protestën.
“Në këtë protestë do të duhej të kishte më shumë njerëz sepse kemi shumë veteranë dhe invalidë të luftës”, ka përfunduar Ymeri
Megjithatë, qëllimin e arritën, konferenca e Trëndafilovës u anulua.
“Për shkak të sigurisë publike është anuluar takimi i sotëm. Nuk dihet nëse do të ketë takim tjetër në ditët në vijim”, ka thënë Zëdhënësja e Dhomave të Specializuara
Gjykata Speciale heton krimet e pretenduara të ish-pjesëtarëve të Ushtrisë Çlirimtare të Kosovës, të kryera kundër pakicave etnike dhe rivalëve politikë, nga janari i vitit 1998 deri në dhjetor të vitit 2000.
