Ambasadori rus ne Serbi Aleksandar Bocan-Kharchenko thotë se vendi i tij nuk e njeh Kosovën dhe mbetet i përkushtuar vazhdimisht ndaj Rezolutës 1244 dhe se, si anëtare e Këshillit të Sigurimit, do të mbështesë vetëm një zgjidhje që korrespondon me interesat kombëtare të Beogradit , qoftë normalizimin e marrëdhënieve me Prishtinën apo qetësimin e krizës aktuale.
Duke folur për planin franko-gjerman, ai e ka cilësuar atë si një përpjekje të perëndimit që ta njoh Kosovën.
‘Ne nuk jemi pjesëmarrës në bisedime dhe mund të krijojmë një opinion vetëm në bazë të raportit të presidentit Aleksandër Vuçiq në parlament dhe në bazë të informacioneve të “rrjedhura” në media. Për mendimin tim, kjo është një përpjekje e Perëndimit për të gjetur një rrugë të tërthortë që Serbia ta njohë Kosovën dhe të hyjë në institucionet ndërkombëtare, para së gjithash në OKB”, ka shtuar rusi.
Madje sipas tij ky plan nuk mund të shërbejë as si bazë e mirë për diskutime të mëtejme.
“Sepse plani drejtpërsëdrejti thotë se Serbia nuk do ta pengojë hyrjen e Kosovës në institucionet ndërkombëtare, edhe pse Perëndimi po përpiqet ta paraqesë atë si rrugë të normalizimit, jo të njohjes. Por në thelb është njohje. Nëse shteti jep pëlqimin për anëtarësim në organizata ndërkombëtare, në këtë rast Kosova, atëherë konsideron se Kosova është subjekt juridik ndërkombëtar, dhe si anëtare e OKB-së, Kosova ekziston si shtet”, ka shtuar Bocan-Kharchenko.
Sipas rusit, zgjidhje të çështjes së Kosovës pa pjesëmarrjen e Rusisë e Kinës nuk ka, transmeton teve1.info.
“Në fund të fundit, një zgjidhje e drejtë është e mundur vetëm me mbështetjen e Këshillit të Sigurimit, duke përfshirë mbështetjen e Rusisë dhe Kinës, si anëtarë të përhershëm. Për këtë arsye mendojmë se kjo temë duhet të kthehet në Këshillin e Sigurimit. Natyrisht, biseda është e nevojshme dhe nuk ka rrugë tjetër për të gjetur një zgjidhje ligjore afatgjatë dhe ndërkombëtare. Dhe kjo është arsyeja pse ne kërkojmë – vetëm BE-ja nuk ka dëgjuar më parë, dhe as tani – që dialogu Beograd-Prishtinë të zhvillohet në bazë të Rezolutës 1244 dhe bazuar në faktin se BE-ja ka marrë pëlqimin dhe mbështetjen nga Asambleja e Përgjithshme e OKB-së”, deklaroi ai për Novosti.
