Ministri i Infrastrukturës, Liburn Aliu, ka thënë se kanë nënshkruar kontratë të re me kompaninë “Salillar” nga Shqipëria për ndërtimin e rrugës Fshati i Ri-Ferizaj
Ai ka deklaruar se vlera e kontratës është 16 milionë e 397 mijë e 809 euro dhe kohëzgjatja e punimeve sipas planit dinamik është një vit.
Aliu tutje thënë se janë detyruar që ta ndërprenë kontratën me operatorin italian për shkak të zvarritjeve së punimeve.
“Bëhet fjalë për projektin e zgjerimit të rrugës nga Fshati i Ri në magjistralen Ferizaj – Prishtinë deri te kryqëzimi i magjistrales tjetër që e lidh Ferizajn me Gjilanin. Gjithsej në 5.6 kilometra do të bëhet asfaltimi dhe rregullimi i rrugës me katër korsi nga dy sa ka qenë, do të rindërtohet ura dhe do të ndërtohen dy rrathë në magjistralen Ferizaj – Gjilan, ndërkaq edhe katër rrathë të tjera në pjesën e magjistrales nga Fshati i Ri deri te kryqëzimi”, ka thënë ai në konferencë për media.
Aliu, ka folur edhe për autostradën Prishtinë-Gjilan – ku tha se në këtë autostradë ka pasur shumë befasi për shkak të shembjeve të dheut dhe shpronësimeve.
“Në konferencën e kaluar në deklaratën time se ‘po pritoj të flasë për autostradën Prishtinë-Gjilan’ një arsyetim të gjatë e kam dhënë atë ditë. Po ju them edhe sot se më shumë angazhim kam pasur në këtë rrugë dhe ky ka qenë viti në të cilin janë kryer më shumë punë për shkak se aty kanë ndodhur shumë befasi. Nga marsi i këtij viti hapja e trasesë tashmë është kryer dhe unë besoj se po shkon mirë. Është projekt që ka pasur shumë befasi”, ka thënë Aliu.
