Kryetari i Aleancës, Ardian Gjini iu ka përgjigjur letrës së u.d presidentes së Kosovës, Albulena Haxhiu për takimin e së martës me subjektet politike në kuadër të përpjekjeve për tejkalimin e situatës së krijuar institucionale.
Gjini iu ka drejtuar Haxhiut duke thënë se “ju nuk jeni Presidente e zgjedhur e Kosovës dhe nuk keni mandat të luani rolin unifikueses së spektrit politik”.
Ai ka theksuar gjithashtu se qëllimi i Vetëvendosjes është zvarritja e bllokadës institucionale deri në një datë që, sipas tij, i konvenon kësaj partie për mbajtjen e zgjedhjeve.
Në fund, Gjini tha se AAK-ja e ka kuptuar këtë qasje dhe nuk dëshiron t’i japë Vetëvendosjes “alibi”.
“Letra e Kryetarit të Aleancës, Ardian Gjini për takimin e ftuar nga Albulena Haxhiu. E nderuar zonja Haxhiu,Ju nuk jeni Presidente e zgjedhur e Kosovës dhe nuk keni mandat të luani rolin e unifikueses së spektrit politik. Ju e Kurti jeni tepër të tejdukshëm se nuk po kërkoni takim për të gjetur zgjidhje. Po kërkoni takim të gjeni fajtor për vendimin tuaj që veçse e keni marrë, për ta dërguar vendin në zgjedhje. Këtë herë edhe në kaos institucional. Qëllimi juaj ëshë më shumë se kaq. Ju doni ta zvarrisni këtë bllokadë deri te data që ju konvenon që të mbahen zgjedhjet. Aleanca e ka kuptuar këtë lojë dhe nuk ju jep alibi. Po t’i donit vërtet votat dhe kuorumin, i keni gjashtë pikat e Aleancës”, thuhet në letrën e Gjinit.
Ndryshe, gjatë ditës së djeshme, Haxhiu ftoi liderët e partive për një takim të martën që synon të kontribuojë në dialogun politik dhe institucional për tejkalimin e situatës aktuale dhe funksionalizimin e institucioneve./teve1.info/
