Aleanca ka dorëzuar në Prokurorinë Speciale një kallëzim penal lidhur me 17 vendime të marra nga Qeveria në detyrë në mbledhjen e 12 gushtit.
Vendimet kanë të bëjnë me emërimin e komisioneve për rekrutimin dhe përzgjedhjen e zyrtarëve të lartë shtetërorë.
Pas dorëzimit të kallëzimit, deputeti i Aleancës, Besnik Tahiri, deklaroi se këto vendime janë në kundërshtim me Ligjin për Qeverinë.
Tahiri tha se edhe juristët që e përfaqësojnë rastin kanë vlerësuar se vendimet e marra nga Qeveria në detyrë janë të kundërligjshme.
“Kemi dorëzuar në Prokurorinë Speciale një kallëzim penal për Qeverinë në detyrë, respektivisht për kryeministrin në detyrë për shkak se me datën 12 gusht të këtij viti ata kanë marrë disa vendime të cilat në vlerësimin tonë dhe juristëve tanë që e përfaqësojnë këtë lëndë bie ndesh me ligjin dhe të gjitha rregulloret që mund t’i ketë një qeveri. E ka të ndaluar me ligjin për Qeverinë të marrë vendime që janë të ndërlidhura me 17 vendime që janë marrë në mbledhjen e Qeverisë, për emërimin e komisioneve për rekrutimin e zyrtarëve të lartë shtetërore në agjencione qeveritare dhe në një rast në përzgjedhjen e një sekretari të përhershëm”, ka thënë Tahiri.
Sipas tij, 17 vendimet lidhen me emërimin e komisioneve për rekrutimin e zyrtarëve të lartë shtetërorë në agjenci qeveritare, ndërsa një prej rasteve ka të bëjë me përzgjedhjen e një sekretari të përhershëm./teve1.info/
