Kryeministri në detyrë i Kosovës, Albin Kurti, ka shprehur ngushëllime për vdekjen e ish-kryeministrit të Shqipërisë, Fatos Nano, duke e përshkruar si një figurë qendrore të tranzicionit politik shqiptar dhe një emër që do të mbetet i paharrueshëm në historinë e përbashkët të Shqipërisë dhe Kosovës.
Në një postim në Facebook, Kurti kujtoi dy takime me Nanon – njëri në vitin 2002, pas lirimit të tij nga burgu në Serbi, dhe tjetri kur Nano ishte sërish në krye të qeverisë shqiptare.
Ai vuri në pah pasionin e Nanos për politikën dhe për kombin, që sipas tij, kanë mbetur të pashlyeshme.
Kurti e cilësoi Nanon si një figurë kyçe në kalimin e Shqipërisë nga sistemi komunist drejt demokracisë dhe rikujtoi se ai kishte shërbyer tre herë si kryeministër gjatë periudhave të vështira të viteve ’90 dhe fillimshekullit XXI, duke kontribuar edhe gjatë kohës së luftës së Ushtrisë Çlirimtare të Kosovës.
“Nano do të mbahet mend mes kryeministrave të Shqipërisë për rolin e tij historik dhe për kontributin ndaj kombit shqiptar”, shkroi Kurti, duke i shprehur ngushëllimet familjes, bashkëpunëtorëve dhe bashkëpartiakëve të tij.
Fatos Nano ndërroi jetë të premten në moshën 73-vjeçare.
Në nderim të Nanos, Shqipëria do të mbajë të dielën ditë zie.
