Në 14 vjetorin e hyrjes në fuqi të Gjykatës Kushtetuese, pushteti kritikoi atë për alenacë me partitë opozitare. Kjo qasje e ekzekutivit po kritikohet nga njohës të fushës, pasi që po konsiderohet si cenim I pavarësisë dhe punës të këtij institucioni.
Me përplasje u përcoll mbledhja e së hënës e komisionit hetimor parlamentar për rastet e dhunës në familje. Kjo pas deklaratës së ministres së Drejtësisë Albulena Haxhiu se Gjykata Kushtetuese është bërë aleat i partive opozitare.
E deklarata të tilla nga partia në pushtet kundrejt sistemit të drejtësisë po konsiderohen të shpeshta përgjatë këtyre dy viteve.
Megjithatë, ky qëndrim i tyre, sipas hulumtuesit të lartë në Institutin e Kosovës për Drejtësi, Lavdim Makshana, po kategorizohet si ndërhyrje në pushtetin gjyqsor.
Edhe këto deklarata, njëjtë sikurse ato që janë bërë ndaj gjykatave të rregullta, gjyqtarëve e prokurorëve me emër të përveçshëm, konsiderohet ndërhyrje në drejtësi. Pushtetet janë të ndara si mes sistemit gjyqësor dhe atij ekzekutiv. Pa dyshim që Gjykata Kushtetuese do duhej të ishte e pavarur dhe të funksiononte si e tillë edhe ndaj pushtetit ekzekutiv. Çdo ndërhyrje ndaj punës së saj, dhe deklarata të tilla publike, cenojnë rëndë pavarësinë e Gjykatës Kushtetuese dhe në tërësi sistemin e drejtësisë, tha hulumtuesi i lartë në Institutin e Kosovës për Drejtësi, Lavdim Makshana.
Tutje, Makshana thekson se vendimet që dalin nga Kushtetuesja duhet vetëm të zbatohen.
“Vendimet e saj janë finale dhe të plotëfuqishme, e si të tilla do duhej vetëm të zbatoheshin pamarrëparasysh a ka mospajtime ndaj vendimeve të Gjykatës Kushtetuese. Gjykata Kushtetuese nuk vlersohet nga ekzekutivi a ka vepruar si e pavarur apo jo sepse sipas mandatit dhe ligjit të Gjykatës Kushtetuese ajo vepron si e pavarur”, u shpreh Makshana.
Në anën tjetër, edhe politologu Fidan Ukaj kritikon qasjen e ekzekutivit.
“Përzierja e politikës në vendimet e gjyqsorit nëpërmjet konferencave për shtyp nuk I ndihmon zhvillimit dhe vendim – marrjes autonome të këtij sistemi përkundrazi e atakon dhe vështirëson punën e sistemit….. politika duhet të ndërtojë politika të cilat e lehtësojnë punën e gjyqësorit dhe asesi se si duhet të marrë vendime dhe si duhet t funksionojë sistemi gjyqsor i Kosovës”, deklaroi politologu, Fidan Ukaj.
Deklarata e ministres Haxhiu, se Kushtetuesja është bërë aleate e opozitës, erdhi pas akuzave nga këta të fundit se Qeveria po synon ta shndërroj vendin në sistem autokrat.
