Aktivistët e huaj të ndaluar në bordin e një anijeje ndihmash për Gazën vazhdojnë grevën e urisë për të pestën ditë radhazi të enjten në shenjë proteste kundër ndalimit të tyre në Izrael, thanë organizatorët.
Anija Handala, që transportonte formulë për foshnje, ushqim dhe ilaçe, u sekuestrua nga forcat izraelite pranë bregdetit të Gazës më 26 korrik, me 21 civilë të paarmatosur në bord, përfshirë ligjvënës, mjekë dhe vullnetarë.
Koalicioni i Flotiljes së Lirisë tha në një deklaratë se shtetasi amerikan Christian Smalls dhe tuniziani Hatem Aouini janë ende nën paraburgimin izraelit në burgun Givon në Ramla, Izraeli qendror, raporton Anadolu.
Pesë aktivistë të tjerë u transferuan në aeroport herët të enjten për deportim të menjëhershëm, shtoi ajo. Të gjithë aktivistët e tjerë janë deportuar në vendet e tyre të origjinës.
Anija me ndihma u nis nga Italia në një përpjekje për të thyer rrethimin disamujor izraelit, i cili e ka lënë popullsinë prej 2.4 milionë banorësh të Gazës në prag të urisë.
Në muajt e fundit, Izraeli ka ndaluar disa anije ndihmash që shkonin në Gaza në ujërat ndërkombëtare.
Në qershor, forcat izraelite pushtuan Madleen, duke ndaluar 12 aktivistë ndërkombëtarë, përfshirë aktivisten suedeze Greta Thunberg dhe anëtaren franceze të Parlamentit Evropian Rima Hassan. Një muaj më parë, MV Conscience u sulmua nga dronë pranë Maltës.
Izraeli ka vendosur një bllokadë në Gaza dhe që nga 2 marsi, ka mbyllur të gjitha kalimet, duke bllokuar hyrjen e konvojeve me ndihma dhe duke injoruar thirrjet ndërkombëtare për t’i rihapur ato.
Sipas Ministrisë së Shëndetësisë së Gazës, të paktën 154 persona kanë vdekur nga uria që nga tetori i vitit 2023, përfshirë 89 fëmijë.
