Prokuroria Speciale e Republikës së Kosovës ka ngritur aktakuzë për krime lufte kundër të pandehurit D.R., i cili dyshohet se ka marrë pjesë në sulme të organizuara ndaj popullsisë civile shqiptare në Gjakovë gjatë luftës në Kosovë, konkretisht në periudhën 7–10 maj 1999.
Sipas njoftimit zyrtar, D.R. akuzohet për përfshirje në një ofensivë të gjerë të forcave ushtarake, policore dhe paramilitare serbe, e cila kishte për qëllim dëbimin dhe dhunimin e popullsisë civile shqiptare.
“Prokuroria Speciale ka ngritur aktakuzë për veprën penale ‘Krim i luftës kundër popullsisë civile’, sipas nenit 142 të Ligjit Penal të RSFJ-së, në fuqi gjatë kohës së kryerjes së veprës penale,” thuhet në komunikatë.
Sipas hetimeve, i pandehuri është përgjegjës për vrasjen e tre civilëve shqiptarë, keqtrajtimin fizik të tyre pas vrasjes, dëbimin e dhunshëm të banorëve nga lagjet e tyre, si dhe për plaçkitjen dhe shkatërrimin e shtëpive në disa pjesë të qytetit të Gjakovës.
Aktakuza është mbështetur në dëshmi të viktimave, dëshmitarëve okularë, identifikimin e të pandehurit përmes fotografive, raporte të Institutit të Mjekësisë Ligjore, dhe prova të tjera materiale të mbledhura gjatë fazës së hetimeve.
I pandehuri ndodhet aktualisht në paraburgim, ndërsa Prokuroria Speciale ka kërkuar vazhdimin e kësaj mase për shkak të rrezikut të mundshëm të arratisjes.
Në përfundim të njoftimit, Prokuroria Speciale ka theksuar përkushtimin e saj për zbardhjen e të gjitha krimeve të kryera gjatë luftës në Kosovë, me qëllim vendosjen e drejtësisë për viktimat dhe ndërtimin e një shoqërie të drejtë dhe demokratike.
