Prokuroria Themelore në Gjakovë, Departamenti për Krime të Rënda, ka ngritur aktakuzë ndaj të pandehurit E.M., për shkak të veprave penale të shitblerjes së paautorizuar të narkotikëve dhe mbajtjes së paautorizuar të armës.
Sipas njoftimit të Prokurorisë, i pandehuri është arrestuar më 11 gusht 2025 në orën 21:25, në rrugën “Gasper Karaqi” në Gjakovë, teksa po lëvizte me automjetin e tij të tipit Audi A6.
Gjatë një pikë kontrolli të vendosur nga Njësia për Reagim të Shpejtë (NJRSH), policia ka ndaluar automjetin dhe gjatë kontrollit në çantën e tij kanë zbuluar gjashtë (6) qese të mbushura me substancë të dyshuar narkotike.
Menjëherë pas kësaj, hetuesit policorë kanë kryer bastisje në banesën e të pandehurit, ku janë gjetur dhe sekuestruar: substanca narkotike, një peshore digjitale, dy palë gërshërë, një lugë metalike,shirit ngjitës,një shkrepës dhe qese të vogla të zbrazëta – të gjitha të dyshuara se janë përdorur për përgatitjen dhe shpërndarjen e narkotikëve.
Sipas raportit të Agjencisë së Kosovës për Forenzikë (AKF), substanca e sekuestruar është identifikuar si kokainë, me peshë totale 342.06 gramë.
Gjithashtu, gjatë bastisjes, i pandehurit i është gjetur një pistoletë me gaz e llojit “Zoraki” dhe një karikator, të cilat i mbante pa leje, në kundërshtim me Ligjin për Armë Nr. 05/L-022.
Veprat penale që i vihen në barrë të pandehurit E.M. janë: “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”, nga neni 267 paragrafi 1 i Kodit Penal të Republikës së Kosovës (KPRK), “Mbajtja në pronësi, kontroll ose posedim të paautorizuar të armëve”, nga neni 366 paragrafi 1 i KPRK-së.
Prokurori i çështjes, me rastin e ngritjes së aktakuzës, ka propozuar që i pandehuri të shpallet fajtor dhe të dënohet sipas ligjit për veprat penale që i vihen në barrë.
