Prokuroria Speciale e Kosovës ka ngritur aktakuzë ndaj të pandehurve: D.Gj, D.T, N.N, LJ.M, K.Gj dhe B.Gj, për kultivimin e bimëve të Hashashit, shkurres së kokainës ose bimëve të kanabisit, raporton teve1.info
Sipas komunikatës së Prokurorisë Speciale të Kosovës, të pandehurit e kanë kryer veprën penale në fshatin Kovaq të Komunës së Zubin Potokut, gjatë muajit korrik të vitit të kaluar.
“Prokuroria Speciale njofton se të pandehurit D.Gj, D.T, N.N, LJ.M, K.Gj dhe B.Gj., gjatë muajit korrik 2022, në fshatin Kovaq, Komuna e Zubin Potokut, në bashkëpunim janë marrë me kultivimin e bimëve narkotike, në një laborator të improvizuar brenda shtëpisë të njërit nga të pandehurit, ku pas një pune intensive hetimore të policisë së Kosovës në bashkëpunim me Prokurorinë e
Shtetit, është arritur deri tek zbulimi i kryerësve të veprës penale të lartcekur, arrestimi i pandehurve, konfiskimi i sasisë narkotike, mjeteve për kultivimin e saj, si dhe pajisjeve ndihmëse”, thuhet në njoftimin e Prokurorisë.
Sipas Prokurorisë, me këto veprime të pandehurit D.Gj, D.T, N.N, LJ.M, K.Gj dhe B.Gj., duke vepruar në grup kanë kryer veprën penale “Kultivimi i bimës së hashashit, shkurres së kokainës ose bimëve të kanabisit”, nga neni 272 paragrafi 1 të KPRK- së lidhur me nenin 275 paragrafi 1 nën paragrafi 1.1 të KPRK-së.
