Inspektorati Qendror i Punës, në bashkëpunim me Policinë e Kosovës – Drejtorinë për Hetimin e Krimeve Ekonomike dhe Korrupsionit, Administratën Tatimore të Kosovës (ATK) dhe Inspektoratin Qendror të Ministrisë së Industrisë, Ndërmarrësisë dhe Tregtisë (IQMINT), ka zhvilluar një aksion të përbashkët inspektues në komunat e Prizrenit dhe Suharekës.
Sipas njoftimit të Inspektoratit Qendror të Punës, aksioni është realizuar në koordinim me Prokurorinë Themelore në Prizren dhe ka përfshirë inspektimin e gjithsej 26 auto-parkingjeve.
Qëllimi i aksionit ishte verifikimi i zbatimit të legjislacionit në fuqi dhe evidentimi i parregullsive që lidhen me ushtrimin e veprimtarisë së këtyre subjekteve.
Gjatë kontrolleve janë konstatuar shkelje të ndryshme, për të cilat institucionet pjesëmarrëse kanë ndërmarrë veprimet përkatëse, secila në përputhje me kompetencat, mandatin dhe përgjegjësitë e saj ligjore.
“Inspektorati Qendror i Punës mbetet i përkushtuar në bashkëpunimin ndërinstitucional për forcimin e zbatimit të ligjit, mbrojtjen e të drejtave të punëmarrësve dhe krijimin e një mjedisi të sigurt dhe të ligjshëm të punës”, thuhet në njoftimin e Inspektoratit Qendror të Punës.
