Kryetari i Federatës së Futbollit të Kosovës, Agim Ademi, ka paralajmëruar se së shpejti institucioni që ai e drejton, do të licencohet nga Ministria e Kulturës, Rinisë dhe Sportit. Nëpërmjet një postimi në Facebook, Ademi ka shkruar se këtij procesi të stërgjatur të licencimit po i vjen fundit, pasi sipas tij këtë e ka paralajmëruar edhe kreu i MKRS-së, Hajrulla Çeku.
Madje, Ademi ka shkruar se Komisioni i Licencimit për arsye që “vetëm ata i dinë”, e ka zvarritur më shumë sesa duhet këtë proces, përkundër përkushtimit maksimal të FFK-së dhe klubeve për kompletimin e të gjithë dokumentacionit.
“Fatkeqësisht, përkundër përkushtimit maksimal të stafit të FFK-së dhe të klubeve në kompletimin e të gjitha dokumentacioneve që ky proces të përmbyllet sa më shpejt, Komisioni i Licencimit për arsye që vetëm ata i dijnë, e ka zvarritur së tepërmi këtë proces, duke shkaktuar shqetësime dhe pengesa të panevojshme, veçmas për klubet, në aspektin administrativ por edhe në atë të përfitimit nga Ligji për Sponsorizim.
Megjithatë, duket se tashmë edhe këtij procesi të stërzgjatur po i vjen fundi, ngase edhe vet kreu i ministrisë së Sportit ka paralajmëruar se licencimi do të ndodhë së shpejti dhe kësisoj do të hiqen pengesat për të ecur përpara dhe për ta vazhduar misionin tonë në zhvillimin e hovshëm të futbollit tone”, ka shkruar Ademi.
Ai ka thënë se miratimi i statutit të ri të FFK-së, që u votua javë më parë nga kuvendarët dhe është në përputhshmëri të plotë me FIFA-n e UEFA-n, do të jetë e ardhshme e ndritur e futbollit.
