Kryetari i Lidhjes Demokratike të Kosovës (LDK), Lumir Abdixhiku, ka bërë të ditur se procesi i diskutimeve për zgjedhjen e presidentit të ardhshëm të Kosovës ka hyrë në një fazë më konkrete.
Pas takimit të sotëm me kryeministrin në detyrë, Albin Kurti, Abdixhiku deklaroi se, pas dakordimit për parimet mbi të cilat duhet të bazohet zgjedhja e presidentit të ardhshëm, palët kanë diskutuar edhe për emra konkretë.
Sipas tij, emrat e propozuar gjatë takimit janë, në masë të madhe, në përputhje me parimet e dakorduara më herët.
“Ky është një hap përpara, meqenëse nga koncepti politik rreth parimeve kemi kaluar në emra”, deklaroi Abdixhiku.
Megjithatë, kreu i LDK-së nuk bëri të ditur emrat e diskutuar, duke e cilësuar procesin si të ndjeshëm.
Ai paralajmëroi se palët do të takohen sërish për të finalizuar marrëveshjen dhe për të përcaktuar presidentin e ardhshëm të Republikës së Kosovës.
Abdixhiku tha se nuk dëshiron të japë detaje lidhur me numrin e emrave apo takimeve, duke theksuar se synimi kryesor është arritja e një marrëveshjeje që do t’i sigurojë stabilitet vendit.
Ai theksoi gjithashtu se presidenti i ardhshëm duhet të jetë një figurë e besueshme dhe e denjë për përgjegjësinë institucionale e shtetërore që bart posti i presidentit.
