Abdixiku në Ditën e të Pagjeturve përmes një postimi në Facebook ka kujtuar të rënët në masakrën e Mejës duke ndarë dhimbjen me familjarët e tyre duke thirrur për drejtësi dhe zbardhjen e fatit të1617 të pagjeturve, shkruan teve1.info.
“Në Ditën e të Pagjeturve të Kosovës, vazhdojmë të thërrasim për drejtësi dhe zbardhjen e fatit të 1617 qytetarëve tanë të pagjetur. Kosova s’mund të ecë përpara pa gjetjen e qetësisë për familjarët e të pagjeturve. Sot, paraditen e kalova në nderim të viktimave të Mejës. Familjet e tyre ende ndjenjë dhimbjen e njëjtë sikurse më 27 prill të vitit 1999. Ata i kanë të freskëta kujtimet e rënda të ndarjes së fëmijëve e burrave nga ta; siç e kanë të freskët dëshpërimin e pafuqisë së tyre për t’i shpëtuar familjarët nga çnjerëzorja. Njeriu është më i fortë se guri – thonë; e vetëm një forcë e madhe mbi sakrificën e rëndë, ka bërë që këto familje t’i kapërcejnë 23 vitet e shkuara drejt”, ka thënë ai.
Abdixhiku me tej ka shkruar se dhembja e familjarëve të tyre është dhembje e të gjithëve dhe është rikujtim i vuajtjeve të popullit të Kosovës për lirinë e sotme.
“Dhimbja e tyre është dhe dhimbje e jona; por mbi të gjitha është rikujtim i vuajtjeve të popullit të Kosovës për lirinë e sotme. Sot, gjithandej Kosovës japim nderimet e tona për civilët e vrarë e dëshmorët e rënë. Çmimi i lirisë së Kosovës ka qenë çmim i vet jetës – sikurse i 376 civilëve të Mejës”, shtoi ai.
Abdixhiku gjithashtu ka shkruar se “Në Mejë, 23 vite më parë, 376 civil shqiptarë – nga ta 36 fëmijë – ishin vrarë e masakruar nga forcat policore dhe ushtarake të Serbisë. Trupat e tyre të pa jetë ishin bartur më pas në formë të organizuar deri në Batajnicë, në periferi të Beogradit, dhe ishin varrosur në një varr masiv. E gjithë masakra dhe mbulimi i saj 280 kilometra larg vendit të krimit, ishin organizuar nga aparati shtetëror serb”.
