Aleanca për Ardhmërinë e Kosovës (AAK) i është kundërpërgjigjur deklaratave të kryeministrit Albin Kurti, duke theksuar se nuk është “strukur”, por nuk do të bëhet pjesë e proceseve që, sipas saj, dëmtojnë rendin kushtetues të vendit.
Në një konferencë për media, shefi i Grupit Parlamentar i AAK-së, Besnik Tahiri, ka kritikuar procesin e zgjedhjes së presidentit, duke e quajtur atë jo demokratik dhe të shoqëruar me manipulim të opinionit publik.
Ai ka theksuar se partia e tij po e ndjek procesin me shqetësim, por nuk do të marrë pjesë në atë që e cilëson si “spektakël politik”.
“Ne nuk jemi strukur, por ne nuk do të bëhemi pjesë e një shkatërrimi të rendit kushtetues, i një spektakli publik dhe politik që po zgjat tash e katër muaj rresht. Jemi këtu në Kuvend dhe në zyrat tona duke e përcjellë me shqetësim të madh, por edhe me përgjegjësi politike si Aleancë për Ardhmërinë e Kosovës. Ne nuk bëhemi pjesë e një procesi që vetëm emrin e ka demokraci dhe zgjedhje të presidentit, por në fakt është manipulim i opinionit publik,” ka deklaruar Tahiri.
Ai ka shtuar se, sipas AAK-së, nëse kryeministri Kurti do të kishte vullnet për zgjedhjen e presidentit, do të kishte hapur dialog me opozitën.
“Po të kishte dashur Albin Kurti ta zgjedhë presidentin, do t’u kishte dhënë mundësi për diskutim kandidatëve të opozitës, sepse ai nuk i ka 80 vota. Duke mos i pasur 80 vota, emrat duhet të vijnë nga opozita dhe të diskutohen në mënyrë serioze, jo përmes mediave, por përmes një procesi të sinqertë politik,” ka shtuar ai.
