Me mijëra vetura hyjnë në Prishtinë çdo ditë.
E për të menaxhuar trafikun në kryeqytet, së fundmi është duke u shqyrtuar mundësia e vendosjes së një takse për veturat që vijnë nga qytetet e tjera.
Siç ka bërë të ditur i pari i Prishtinës, Përparim Rama, pagesa për të do të jetë 1 euro.
Mirëpo këtë propozim po e shohin të paligjshëm nga opozita në kryeqytet.
“Qytetarët e Prishtinës edhe të gjithë ne po ballafaqohemi edhe një herë me një propozim jo të mirë menduar dhe eksperimental të kryetarit Përparim Rama. Ai sërish pa asnjë studim, pa asnjë analizë konkrete profesionale del me një studio televizive dhe jep një informacion të tillë dhe thotë se do të merret një vendim që të taksohet një euro hyrja e veturave nga jashtë Prishtina në Prishtinë. Ky vendim në qoftë se vije natyrisht që duhet të bëhet në përputhje me legjislacionin në fuqi. E që fillimisht nuk ka legjislacion që e rregullon dhe e lejon vendosjen e një takse të tillë”, deklaroi asamblistja e LVV-së, Berita Abazi-Muhadri.
Problematike këtë çështje po e sheh edhe njohësi i komunikacionit, Lavdim Hamiti.
“Në këtë gjendje nuk ka asnjë mundësi që të bëhet me pagesë hyrja në Prishtinë. Po për shkak të mungesës së njerëzve adekuat në rregullimin e komunikacionit, jo ekspertëve të duhur dhe i ka kapur paniku se nuk dinë se si të rregullojnë komunikacionin, atëherë dalin me këto lajme skandaloze që tregojnë se do të bëjnë hyrjen me pagesë në Prishtinë”, tha ai.
Por sa ka bazë ligjore të mirret një vendim i tillë?
“Në bazën ligjore ose juridike ka telashe bukur të mëdha sepse një masë e tillë e cila kufizon në rend të parë lirinë e lëvizjes së qytetarëve dhe mallrave dhe shërbimeve me një veprim të caktuar sikur kjo taksë. E dyta sjellë në pozitë të pabarabartë kategoritë e ndryshme të qytetarëve”, tha ish-avokati i popullit, Hilmi Jashari.
Televizioni ka tentuar të marrë një prononcim edhe nga Komuna e Prishtinës, por të njëjtit nuk kanë kthyer përgjigje.
