Përmes një konference të përbashkët për media me Presidenten, Vjosa Osmani, Vella e konfirmoj se Malta do ta mbështesë Kosovën në përpjekjet e saj për tu bërë anëtare e Bashkimit Evropian.
“Sa i përket anëtarësimit në Bashkimin Evropian e kam thënë shumë qartë se Malta do ta mbështesë Kosovën në përpjekjet e saj për tu bërë anëtare e Bashkimit Evropian, nuk kemi ndonjë problem me këtë. Jemi të bindur që kjo duhet të ndodhë eventualisht jo vetëm sepse është në interes të popullit të Kosovës por është edhe në interesin më të mirë të Bashkimit Evropian”, tha ai.
Sipas presidentit të Maltës, vendimi për liberalizimin e vizave është vonuar 4 vite pasi që thekson se edhe vetë BE-ja e ka konfirmuar që Kosova i ka plotësuar të gjitha kushtet që nga viti 2018.
Ai thekson se nuk sheh ndonjë arsye që Bashkimi Evropian të mos i hap kufijtë ndaj njerëzve të Kosovës.
“…Bashkimi Evropian ka thënë se Kosova i ka plotësuar të gjitha kushtet e nevojshme që në vitin 2018. Pra jemi 4 vite vonë, pajtohem plotësisht me të gjitha zhvillimet që mund të ndodhin mirëpo mendoj që asgjë përveç liberalizimit të vizave nuk do të jetë i kënaqshëm për popullin e Kosovës që gjithë këto vite ka bërë gjithçka që është e nevojshme për të arritur liberalizimin e vizave”, tha ai.
Tutje duke e komentuar çështjen e Liberalizimit të vizave për Kosovën, Vella tha se kjo është bërë e qartë edhe në raportin e Komisionit Evropian ku thuhet se ky është një vendim strategjik i Bashkimit Evropian që vendet e Ballkanit Perëndimor të anëtarësohen në BE.
Ndërkohë, Presidenti i Maltës, pritet që të takohet sot edhe me Kryetarin e Kuvendit të Kosovës, Glauk Konjufca./Teve1.info/
