Prokuroria Speciale, në bashkëpunim me Policinë e Kosovës dhe Agjencinë e Kosovës për Inteligjencë ka realizuar mbrëmë një aksion kundër trafikimit të narkotikëve, gjatë të cilit janë arrestuar pesë persona dhe janë sekuestruar mbi 37 kilogramë substancë e dyshuar narkotike e llojit heroinë.
Ushtruesi i detyrës së prokurorit të Prokurorisë Speciale, Dren Paca, gjatë një konference për media ka bërë të ditur se në mesin e të arrestuarve janë edhe dy shtetas të huaj.
“Mbrëmë Prokuroria Speciale së bashku me Policinë e Kosovës dhe AKI-në kanë realizuar me sukses një aksion gjatë të cilit janë arrestuar 5 persona, dy prej të cilëve shtetas të huaj. Njëkohësisht janë sekuestruar mbi 37 kg substancë e dyshuar narkotike e llojit heroinë”, ka deklaruar Paca.
Ai ka theksuar se Prokuroria Speciale do të vazhdojë luftën kundër krimit të organizuar dhe trafikimit të narkotikëve, pa marrë parasysh se kush qëndron prapa këtyre veprimtarive.
Duke qenë se hetimet janë në fazën fillestare, Paca ka bërë thirrje për kujdes dhe përmbajtje në publikimin e informacioneve lidhur me rastin./teve1.info/
