Gjykata e Apelit ka anuluar aktgjykimin me të cilin Muhamet Alidemaj ishte dënuar me 13 vjet burgim për krime lufte kundër popullsisë civile, duke e kthyer rastin në rigjykim në Gjykatën Themelore në Prishtinë.
Departamenti Special i Apelit ka aprovuar ankesën e Alidemajt dhe mbrojtësit të tij, duke konstatuar shkelje esenciale të procedurës penale dhe mangësi në vlerësimin e provave nga gjykata e shkallës së parë.
Në komunikatën e lëshuar të mërkurën, Apeli ka bërë të ditur se të akuzuarit i është vazhduar masa e paraburgimit deri në vendimin e ardhshëm të gjykatës së shkallës së parë.
Sipas arsyetimit të Apelit, Gjykata Themelore nuk ka dhënë shpjegime të mjaftueshme lidhur me veprimet konkrete dhe kontributin e Alidemajt në bashkëkryerjen e veprës penale.
Po ashtu, është vlerësuar se gjykata e shkallës së parë është mbështetur vetëm në deklaratat e tre dëshmitarëve, pa i trajtuar në mënyrë të plotë provat e tjera të administruara gjatë shqyrtimit gjyqësor.
Apeli ka evidentuar edhe mungesën e shqyrtimit të veçantë të pretendimeve të mbrojtjes, si dhe të çështjes së identifikimit të të akuzuarit, për të cilat kishte dhënë vërejtje edhe në vendimin e mëparshëm për kthimin e rastit në rigjykim.
Ndryshe, më 2 shkurt 2026, Gjykata Themelore në Prishtinë e kishte shpallur Alidemajn fajtor për krime lufte kundër popullsisë civile dhe e kishte dënuar me 13 vjet burgim. Në këtë dënim ishte përfshirë edhe koha e kaluar në paraburgim, nga 30 marsi 2021.
Në vendimin e saj, Gjykata e Apelit i ka dhënë udhëzime konkrete Gjykatës Themelore për rigjykimin, duke kërkuar që të vlerësohen të gjitha provat, përfshirë deklaratat e dëshmitarëve të mbrojtjes, procesverbalet e identifikimit dhe provat e tjera materiale.
Gjithashtu, gjykata duhet të japë arsyetim të qartë për faktet që i konsideron të vërtetuara ose të pavërtetuara dhe të përshkruajë veprimet konkrete të të akuzuarit në përputhje me provat e administruara.
Ky është rikthimi i sërishëm i rastit në rigjykim, pasi sipas Apelit, mangësitë e evidentuara në vendimin e mëparshëm nuk janë eliminuar.
