Kryeministri i Kosovës, Albin Kurti, ka kërkuar hetim të plotë dhe të menjëhershëm për vrasjen e Arlinda Zekajt në Vitomiricë të Pejës, duke theksuar se viktima kishte paralajmëruar institucionet për rrezikun ndaj jetës së saj vetëm tri ditë para se të vritej.
Duke folur në seancën e jashtëzakonshme të Kuvendit të Kosovës, Kurti tha se Arlinda Zekaj kishte kërkuar mbrojtje nga institucionet, por nuk e kishte marrë mbrojtjen e nevojshme për të shpëtuar jetën.
“Një bashkëqytetare e jona kërkoi, por nuk e mori mbrojtjen që i duhej për të mbetur gjallë. Arlinda Zekaj u vra dje. Vrasja mizore e Arlinda Zekajt është tronditëse për të gjithë ne”, deklaroi Kurti, raporton Klankosova.tv.
Kryeministri përmendi se më 22 tetor, vetëm tri ditë para vrasjes, Zekaj i ishte drejtuar Prokurorisë, duke paralajmëruar për rrezikun me të cilin po përballej.
Sipas tij, këto rrethana kërkojnë një hetim të plotë për të sqaruar se si është trajtuar kërkesa e viktimës dhe nëse institucionet përgjegjëse kanë ndërmarrë veprimet e nevojshme për ta mbrojtur atë.
“Tri ditë para se të vritej, Arlinda i ishte drejtuar Prokurorisë, duke paralajmëruar për rrezikun ndaj jetës së saj. Këto rrethana kërkojnë hetim të plotë dhe të menjëhershëm, ndërkohë që dorasi është në arrati”, theksoi Kurti.
Ai kërkoi që Prokuroria dhe institucionet e tjera përgjegjëse të japin përgjigje për mënyrën se si janë trajtuar paralajmërimet e viktimës dhe nëse janë ndërmarrë masa konkrete për parandalimin e tragjedisë.
Kurti nënvizoi se çdo shkelje e mundshme duhet të zbardhet dhe përgjegjësitë të identifikohen përmes hetimit.
“Çdo shkelje duhet të zbardhet”, përfundoi kryeministri nga foltorja e Kuvendit.
