Kryetari i Komunës së Prizrenit dhe nënkryetari i PDK-së, Shaqir Totaj ka falënderuar Bedri Hamzën pas dorëheqjes së tij nga pozita e kryetarit të PDK-së.
Përmes një postimi në Facebook, Totaj ka vlerësuar maturinë, ndershmërinë dhe përkushtimin e Hamzës gjatë udhëheqjes së partisë, duke theksuar rëndësinë e ruajtjes së unitetit brenda subjektit politik.
Ai ka theksuar se, pavarësisht sfidave me të cilat është përballur partia, interesat e vendit dhe uniteti politik duhet të jenë mbi ambiciet personale.
Sipas Totajt, dorëheqja e Hamzës krijon hapësirë për një proces të ri demokratik të zgjedhjeve të brendshme në PDK, ndërsa kontributi i tij në parti do të vazhdojë të mbetet i rëndësishëm.
Postimi i plotë i Shaqir Totajt:
“Faleminderit, Kryetar Bedri Hamza, për maturinë, ndershmërinë dhe përkushtimin e treguar gjatë udhëheqjes së Partisë Demokratike të Kosovës.
Në një periudhë plot sfida të mëdha, ju dëshmuat se interesat e vendit dhe ruajtja e unitetit të familjes sonë politike qëndrojnë gjithmonë mbi çdo ambicie personale.
Dorëheqja juaj fisnike hap një rrugë të re dhe demokratike për proceset e brendshme zgjedhore, por kontributi juaj si shtyllë e rëndësishme e PDK-së do të vazhdojë të mbetet i shumë i rëndësishëm.
Mirënjohës sinqerisht për punën, dinjitetin dhe rrugëtimin e përbashkët! Me respekt!”, ka shkruar Totaj.
