Analisti politik nga Shqipëria, Ben Andoni, ka folur për emisionin “Ditari” në Tëvë1 lidhur me protestat e tensionuara të studentëve në Tiranë.
Andoni ka deklaruar se deri më tani, përpjekja e vetme për dialog ka ardhur nga presidenti i Shqipërisë, Bajram Begaj, i cili ka shprehur gatishmërinë për të vënë në dispozicion zyrën e tij për dialog.
Ndërkohë, sipas analistit, kryeministri Edi Rama është përpjekur ta zhvendosë vëmendjen nga situata e brendshme, duke vënë në pah suksesin e Shqipërisë në procesin e integrimit evropian dhe mbylljen e kapitullit të 20-të të negociatave me Bashkimin Evropian.
“Unë besoj se Tirana do të ketë edhe ditë të tjera të tilla. Sa i përket dialogut, e vetmja përpjekje deri tani është ajo e presidentit të vendit, i cili ka thënë se zyra e tij është e hapur për dialog. Por, nga ajo që kuptoj, ai është një prej hallkave të pushtetit që pothuajse nuk respektohet nga protestuesit, për shkak të lidhjes së tij me qeverisjen e Edi Ramës”, ka deklaruar Andoni.
Ai ka shtuar se mungesa e një reagimi të kryeministrit gjatë këtyre dy ditëve mund të lidhet edhe me përpjekjen për ta vënë në plan të parë përparimin e Shqipërisë në negociatat me BE-në.
Analisti ka parashikuar një situatë problematike edhe në orët dhe ditët në vijim, duke vlerësuar se zgjidhja mund të kërkojë përfshirjen e faktorëve të tjerë.
“Personalisht i parashikoj problematike edhe orët në vazhdim, por besoj se do të ketë një lloj zgjidhjeje nëpërmjet ndërhyrjes, ndoshta edhe të faktorëve të tjerë, në këtë tollovi të madhe që po ndodh”, ka përfunduar Andoni./teve1.info/
