Shefi i Grupit Parlamentar të Aleancës, Besnik Tahiri, ka propozuar tri prioritete për Komisionin për Legjislacion, duke kërkuar që ato të përfshihen në planin e punës së këtij komisioni.
Përmes një postimi në Facebook, Tahiri ka bërë të ditur se propozimet e tij synojnë forcimin e sundimit të ligjit, rritjen e efikasitetit të sistemit të drejtësisë dhe avancimin e llogaridhënies institucionale.
Prioriteti i parë, sipas tij, është monitorimi i zbatimit të ligjeve për Gjykatën Komerciale dhe Gjykatën Administrative, për të vlerësuar rezultatet e tyre, sfidat në funksionim dhe ndikimin në efikasitetin e drejtësisë.
Si prioritet të dytë, Tahiri ka propozuar nisjen e hartimit të Ligjit për Deputetët, i cili do të rregullonte më qartë të drejtat, detyrimet dhe përgjegjësitë e deputetëve, si dhe statusin dhe përfitimet e tyre gjatë dhe pas përfundimit të mandatit.
Ndërkaq, propozimi i tretë lidhet me shqyrtimin e mundësisë për themelimin e një gjykate të specializuar për luftimin e korrupsionit.
Në kuadër të këtij propozimi, Tahiri ka sugjeruar që anëtarët e Komisionit për Legjislacion të zhvillojnë një vizitë studimore në Strukturën e Posaçme kundër Korrupsionit dhe Krimit të Organizuar (SPAK) dhe në Kuvendin e Shqipërisë, për t’u njohur me përvojën shqiptare, procesin e themelimit të këtij institucioni dhe sfidat e tij.
Sipas Tahirit, trajtimi i këtyre tri çështjeve si prioritete do të kontribuonte në përmirësimin e funksionimit të institucioneve dhe në forcimin e sundimit të ligjit në Kosovë.
