Një person është arrestuar dhe një tjetër ka kërkuar ndihmë mjekësore pas një rrahjeje që ka ndodhur sot rreth orës 14:00 në rrugën “UÇK” në Mitrovicë.
Zëdhënësi i Policisë për rajonin e Mitrovicës, Avni Zahiti, ka konfirmuar për KosovaPress se një person i dyshuar është arrestuar, ndërsa personi tjetër ka kërkuar tretman mjekësor.
“Rreth orës 14:00 është raportuar një rast rrahje në rrugën ‘UÇK’ në Mitrovicë. Një person i dyshuar është arrestuar, ndërsa personi tjetër ka kërkuar tretman mjekësor. Rasti është duke u hetuar nga njësitet kompetente policore”, tha Zahiti.
Zëdhënësi i Spitalit Rajonal në Mitrovicë, Shpend Fazliu, ka konfirmuar se një person i lindur në vitin 1998 ka kërkuar ndihmë mjekësore pas rrahjes.
“Ju konfirmojmë se në ora 14:40, një person 28-vjeç ka kërkuar ndihmë mjekësore si pasojë e rrahjes. Ekipet emergjente menjëherë kanë ofruar ndihmën e nevojshme mjekësore. Pas ofrimit të ndihmës mjekësore dhe qepjes së plagës, është liruar nga Shërbimi Emergjent me përcjellje nga policia”, ka thënë Fazliu.
