Bashkëpunimi në fushën e mbrojtjes ndërmjet Kosovës dhe Shqipërisë po thellohet përmes aktiviteteve dhe trajnimeve të përbashkëta ushtarake.
Ministri në detyrë i Mbrojtjes, Ejup Maqedonci, ka bërë të ditur se pjesëtarët e Forcës së Sigurisë së Kosovës kanë zhvilluar qitje me mortaja të kalibrave 60, 81 dhe 120 mm në poligonin e qitjes me armë të rënda të Regjimentit të Këmbësorisë së Veriut të Forcave të Armatosura të Shqipërisë.
Sipas Maqedoncit, aktiviteti është zhvilluar në kuadër të trajnimeve në fushën e artilerisë dhe zjarrit indirekt.
“Gjatë këtij aktiviteti, ushtarakët tanë dëshmuan përgatitje të lartë profesionale, disiplinë dhe zbatim të standardeve gjatë ekzekutimit të qitjeve”, ka shkruar Maqedonci.
Ai ka theksuar se aktivitete të tilla kontribuojnë në zhvillimin e kapaciteteve të FSK-së në fushën e artilerisë, rritjen e aftësive operacionale dhe forcimin e ndërveprueshmërisë ndërmjet forcave të Kosovës dhe Shqipërisë.
“Bashkëpunimi në fushën e mbrojtjes ndërmjet Kosovës dhe Shqipërisë po thellohet e forcohet vazhdimisht përmes aktiviteteve të përbashkëta stërvitore”, ka deklaruar Maqedonci.
