Presidenti i Sirisë, Ahmed al-Sharaa, dhe Princi i Kurorës i Arabisë Saudite, Mohammed bin Salman, kanë mbikëqyrur nënshkrimin e disa marrëveshjeve.
Ato përfshijnë një marrëveshje bashkëpunimi në mbrojtje, dhe më shumë se 403 milionë dollarë kredi saudite për sektorët e energjisë, strehimit, shëndetësisë dhe infrastrukturës në Siri, ka shkruajtur Al Jazeera.
Marrëveshjet u nënshkruan të mërkurën, gjatë vizitës së dytë të al-Sharaa në Riad në më pak se një muaj.
Ministria e Jashtme e Sirisë e quajti marrëveshjen e bashkëpunimit midis ministrive të mbrojtjes të të dy vendeve “më të rëndësishmen” nga marrëveshjet. Por nuk i zbuloi kushtet.
Marrëveshja e mbrojtjes erdhi disa ditë pasi Ministri i Jashtëm i Sirisë, Asaad al-Shaibani, tha se qeveria e tij po shqyrtonte nëse do t’i bashkohej një pakti të ndërsjellë mbrojtës midis Arabisë Saudite, Turqisë dhe Pakistanit.
